منتدى الحب



 
الرئيسيةالبوابةاليوميةمكتبة الصورس .و .جبحـثالتسجيلالأعضاءدخول

شاطر | 
 

 موضوع للبنات فقط ولوسمحتم بعد اذنكم مفيش ولاد تدخل

اذهب الى الأسفل 
كاتب الموضوعرسالة
نورا
عضو ماسي
عضو ماسي
avatar

عدد الرسائل : 1386
مزاجى :
تاريخ التسجيل : 25/07/2010

مُساهمةموضوع: موضوع للبنات فقط ولوسمحتم بعد اذنكم مفيش ولاد تدخل   الخميس 05 أغسطس 2010, 11:09


نبدأ ب بسم الله

أولا :البشرة


1-تفتيح الوجه

ما انصحكيش بأي كريم تفتيح للبشرة، لكن الأفضل إنك تستخدمي الوصفات الطبيعية وده ماسك كويس أوي ممكن تستخدميه

-ماسك الزبادي والليمون
ده ببساطة بتعمليه بإنك تخلطي معلقتين من الزبادي مع نقطتين من عصير الليمون، وتفرديه على بشرتك وتسيبيه لغاية ما ينشف على وشك لمدة ساعتين وبعدين تغسلي وشك، وممكن تعمليه مرة أو مرتين كل أسبوع، وممكن إنك تحطي على وشك طبقة من الزبادي كل يوم بعد ما تتعرضي للشمس.


-ماسك الزبادي بالخيار اللي بيفتح البشرة ويحافظ على نضارتها ويرجعها صافية.
الماسك ده بسيط جداً وكل اللي عليكي إنك تبشري نصف خيارة وتخلطيها مع الكمية المناسبة من الزبادي، وبتفردي الماسك على وشك وتسيبيه لغاية لما تحسي إن نشف على وشك وبعد كده افركي بشرتك بالراحة واشطفيها بمية باردة

-بياض بيضه ونشا وعصير ليمون

2-تفتيح الرقبة

ده ماسك حلو أوي لتفتيح الرقبة ممكن تعمليه ومكوناته:3 معالق جلسرين+معلقة خميرة+معلقة فازلين+صفار بيضة+معلقة زيت زيتون+عصير ليمونة.
وبعد كده تخلطي كل الحاجات دي مع بعض وتحطيها على رقبتك لمدة ساعتين، وممكن تعملي الماسك ده كل يوم وهتشوفي الفرق بنفسك


3-حبوب واحمرار بعد ازالة شعر الوجه

بالنسبة للحبوب
-تقدري تتخلصي من الحبوب دي عن طريق إنك تخلطي "قليلا من الماء" مع بودرة التلك وتعملي منها عجينة لينة توضع على المكان المنزوع منه الشعر وسيبيها حتى تجف واغسليها كويس ودي بتخفف من الاحمرار والحساسية الناتجة عن نزع الشعر.

بالنسبة للاحمرار
-املي طبق غويط بالثلج وضيفي ليه لبن وبعدين غطسي حته قطن في الطبق ده وضعيها على المناطق اللي بتعاني من الاحمراروسيبيها شويه وحطى طبقة تانيه بعد 15 دقيقة وكرري العملية دى مرتين عشان بشرتك ترجع لحالتها الطبيعية


4-لنضارة الوجه

بالنسبه لنضارة البشرة فالماسك ده مناسب جداً عشان تحافظي على نضارة بشرتك وهو بيتكون من خيارة ومعلقتين عسل نحل.
الطريقة:اضربي الخيارة في الخلاط وبعدين ضيفي عليها العسل، وافردي الخليط ده على وشك، وسيبيه لمدة ربع ساعة وبعد كده اغسلي وشك بماء دافئ والماسك ده ممكن تعمليه مرة كل اسبوع وإن شاء الله هتحسي بنتيجة.


5-بقع الوجه

وكل اللي عليكي إنك تقشري ثلاث حبات لوز وتنقعيهم في الماء وبعدين اطحنيهم، وبعد كده تضيفي معلقة صغيرة من عصير الليمون وبياض بيضة واحدة لعجينة اللوز وبعدين حطي طبقة من الخليط ده فوق البقع وبعدين اشطفي وجهك بماء فاتر بعد 15 دقيقة, وبتكرري الماسك ده يومياً علشان تحسي بالفرق.


6-هالات سوداء

وبالنسبه للهالات السودة حاولى إنك تنامى كويس بالليل وكمان بلاش تنامي في النور وممكن تستخدمى زيت اللوز المر وزيت جنين القمح لأن الأتنين كويسين لمشكلة الهالات السودة

و دي شوية وصفات طبيعية ممكن تعمليها لتفتيح الهالات السوداء:

أولاً: الخميرة
عبارة عن معلقة صغيرة خميرة + فنجان لبن بارد + معلقة صغيرة زيت زيتون + كمية صغيرة من الدقيق تكون كافية لتماسك الخليط مع بعضه.
الطريقة :
بتخلطي المكونات دي مع بعضها كويس وبعد كده تفردي الخليط حوالين عينيكي وبعد كده افردي قطعة من الشاش النظيف على عينيكي و سيبيه لمدة 20 دقيقة وبعد كده تشيلي الشاش وامسحي عينيكي بلطف بقطنة مبللة بماء الورد لمدة 5 دقائق بس من غير ما تضغطي على عينيكي و تكرري الطريقة دي مرتين في الأسبوع .

ثانياً : الخيار
ممكن إنك تضعي شرائح الخيار بحيث تغطي العين والمنطقة الموجود فيها الهالات السوداء وتوضع الشرائح لمدة 15 دقيقة. كرري هذه العملية كل مساء.

ثالثاً: خيار برضه
المكونات:
نصف كوب خيار مبشور.
بياض بيضة.
2 ملعقه حليب.
الطريقة:
تخلط المكونات جيدا لعمل عجينة رقيقة وتترك على الوجه لمدة 20 دقيقة، ثم يشطف الوجه بالماء الفاتر. ودي بتساعد على التخلص من الهالات السوداء وكمان بتساعد على تفتيح البشرة.

رابعاً: البطاطا
أحضري بطاطا، ثم قومي ببشرها ثم ضعيها في الخلاط ومعها القليل من الماء.. أحضري قطعة شاش لتصفية الخليط..
ضعي عصير البطاطا أسفل العين، ثم اتركيه لمدة تتراوح بين 15 إلى 20 دقيقة حتى يمتصه الجلد، ثم قومي بتنظيف آثار النشا المتبقية على الوجه.
وبالنسبة للحبوب اللي في وشك فالأحسن إنك تستشيري دكتور علشان يحدد لك نوعها ويوصف لك أنسب علاج ليها.


7-اثار حبوب الوجه

لازالة آثار الحبوب الطريقة :تذوبي معلقة خميرة في معلقة كبيرة ماء وبعدين تضيفي معلقة عسل ومعلقة دقيق وتخلطي كل المكونات لحد ما تكون زي العجينة، افرديها على الوجه ما عدا طبعاً منطقة العين والشفاه واتركي الماسك لمدة عشرين دقيقة وبعدها اشطفي الوجه بماء دافئ، وتأكدي إن النتيجة مذهلة، والماسك ده بينظف البشرة ويفتح لونها ويضفي عليها نضارة ويخفي اى اثر للحبوب الموجودة، وأنصحك بالماسك مرة في الأسبوع


8-البشرة المختلطة


أما بالنسبة لمشكلة بشرتك المختلطة فانتي ممكن تستعملي الماسك ده واللي بيتكون من:
بطاطس مسلوقة.
معقتين كبار زبادي.
معلقة كبيرة نشا.
3 معالق كبيرة دقيق ذرة.
ربع معلقة صغيرة زيت زيتون.
4 معالق كبيرة من ماء الأرز المسلوق.
طريقة التحضير:
اهرسي البطاطس واخلطي المكونات مع بعضها في الخلاط، وبعدين إفردي الماسك على وجهك واتركيه لمدة 10 دقائق، ثم اغسليه بالماء البارد.


والماسك ده مناسب جدا للبشرة المختلطة وهو ماسك الجزر والمكوناته: 1/2 جزرة متوسطة الحجم+1/4 ملعقة عسل نحل.
الطريقة: قطعي نصف الجزرة شرائح واعصريها وصفيها، وبعد ما تحصلي على هذا العصير ضيفي إليه العسل واخلطي هذا الخليط، وادهني بيه وشك لمدة ربع ساعة، وبعد كده اغسلي وشك بالماء الدافئ


9-تفتيح المنطقة الحساسة

ممكن إنك تعملى الوصفة دى ومكوناتها: زيت زيتون + زيت لوز + دقيق خشن (دقيق البسيسة)=دقيق الذرة
الطريقة:اخلطي كل المكونات دي مع بعضها وافركي بها المناطق دي، وعلشان تشعري بالنتيجة ممكن تعملي الوصفة دي 3 مرات في الأسبوع.
بتحطي المكونات على حسب الكمية اللي تكفيكي يعني ممكن تحطي معلقة كبيرة من دقيق البسيسة وتحطي عليها الكمية المناسبة من زيت اللوز وزيت الزيتون

10-تفتيح الرجل

دي طريقة سهلة أوي ممكن تعمليها وهي إنك تدهنيها بزيت زيتون وبعد كده تدعكيها كويس بنصف ليمونة مغموسة في ملح ناعم وممكن تعملى الوصفه دى مرتين فى الأسبوع عشان تحسى بنتيجة سريعة


11-لتنعيم وتقوية الاظافر

-وبالنسبه للأظافر الضعيفة ممكن تدهني أظافرك وكل الجلد المحيط بها بعصير الليمون 3 مرات
في اليوم لمدة عشرة أيام بس خدي بالك إنك تغسلي ايديكي قبل وضع الليمون

-ممكن تدهني ايدك كل يوم بخليط من الجلسرين والليمون لإنهم بينعموا الإيد جداً وكمان الليمون بيفتح البشرة،
وممكن إنك تدعكي منطقة الأظافر بنصف ليمونة كل يوم علشان تقوي أظافرك وتفتحي المنطقة دي.


12-اسمرار حول الفم والدقن وعند الانف

ممكن تعملي الوصفة دي وهي عبارة عن معلقة دقيق + معلقة عصير ليمون + بشر برتقال + معلقة عصير برتقال + معلقة زيت لوز -استعملي زيت لوز مر.، وبتخلطي كل المكونات دي مع بعضها وتدهني بيها المناطق الغامقة في وشك وتسيبيها لمدة خمس دقايق، وممكن تعمليها مرتين في الأسبوع وإن شاء الله هتحسي بالنتيجة على طول.


13-الرؤوس السوداء

بصى الماسك دة كويس وهيساعدك على التخلص من مشكله الرؤوس السوداء
كل اللي عليك إنك تحطي شوية خميرة على ردة وتعجنيهم بماء ورد أو عسل وبعد ما تعملي حمام بخار لبشرتك تحطي الخليط على بشرتك وتسيبيه 20 دقيقة وقبل ما تشيليه حاولي تضغطي برفق على البشرة باستخدام قطنة أو منديل،وبعد كده افركي بشرتك كويس، وبعدين إغسلي وشك بماء فاتر .


14-غسول للمنطقة الحساسة

الملح والميه بتستخدميه كغسول مش أكتر وهو بيكون ملح الطعام بتاخدي معلقة كبيرة ملح وتدوبيها في كوب مية وتغسلي بهم المنطقة دي.


15-لتقليل شعر الجسم

بصى لازم تعملى تحاليل عشان تتأكدى إنك معندكيش مشكله صحيه، وطبعاً السويت هى أفضل طريقه لأزاله الشعر، لكن مفيش مشكلة إنك تستخدمي ماكينة إزالة الشعر، ودي كمان طريقة طبيعية بتقلل نمو الشعر

-وكل اللي عليكي إنك تجيبي ترمس وتنقعيه في مية لمدة 6 ساعات وبتاخدي المية بتاعته وتحتفظي بيها في الثلاجة وادهني منها على إيديكِ ورجليكِ وكل مكان عاوزاه خالي من الشعر، واستمري على ذلك لمدة 3 أسابيع يوميا.

--عشب السعد من العطار خدي 3 معالق على لتر ماء اغليه وبعدين سيبيه شويه وبعدين حطيه


16-لكثافة الحواجب

ادهنيهم بزيت الخروع قبل النوم


17-ازالة الشعر

بالنسبه لأزاله الشعر فأفضل طريقه هى السويت وأنا مش بانصح بأستخدام الكريمات خالص لإنها مش بتشيل الشعر من الجذور وبيطلع بعد كده أكتر وشكله مش حلو


ودي مشكلة السيلك بل
(انا الشعر فى ايدى مش بيطلع متساوى ولمما اعمل بالسويت بيبقى فيه شعر صغير بعمله بالماكينه براون بيطلع خشن وبيطلع بسرعه فيه طريقه تانيه وكمان فى كف ايديا المسام باينه نقط دايما حتى لو شلت الشعر اعمل ايه بتخلى ايديا شكلها وحش)
حل مشكلتك في إنك تمتنعي غن إزالة الشعر بالماكينة وتحاولي تشيلي الشعر الصغير ده بالملقاط أو الفتلة.


18-البشرة الدهنية


-لازم تعرفي أن البشرة الدهنية محتاجة إلى عناية من نوع خاص، وده عن طريق تنظيفها كل يوم 3 مرات على الأقل بصابون طبي زي "ديتول" أو صابونة "كبريت"، ويُفضّل إنك قبل ما تنامي تغسليها بماء ساخن، وتجففيها كويس بس خلي بالك إنك تجففيها براحة جداً، وبلاش تستعملي كريمات مرطبة بتحتوي على نسبة عالية من الدهون؛ لأن الكريمات دي بتساعد على زيادة الحبوب، ويا ريت تستخدمي ماسكات طبيعية علشان تتخلصي من أي مشاكل ممكن إنها تظهر في بشرتك، ومن ضمن الماسكات اللي ممكن إنك تعمليها في البيت هو غسول النعناع الاخضر وده غسول مفيد جداً للبشرة الدهنية بيساعد على تخليصها من الحبوب اللي ممكن إنها تظهر فجأة...
المكوّنات:
• ورق نعناع أخضر
• عصير برتقال
• عصير ليمون
• عصير خيار
• ماء الكرنب.. "وده بتحضريه بإنك بتسلقي الكرنب في شوية ميه، وتاخدي الميه دي وتستعمليها في الماسك".
الطريقة:
اغلي ورق النعناع في لتر ماء، وبعد كده ضيفي إليه عصير البرتقال وعصير الليمون وعصير الخيار وماء الكرنب... واغسلي بشرتك بالغسول ده كل يوم بعد ما تاخدي حمامك اليومي، وبعد مرور 3 أو 4 دقائق من استخدامه تشطفي بشرتك بالماء الفاتر


-و أثناء فصل الشتاء البشرة يتكون معرضه للجفاف فلازم تستخدمى كريم مرطب لبشرتك زى نيفيا،دوف أو جونسون وأثناء فصل الصيف البشرة بتكون معرضه للعرق بصفه مستمرة فلازم إنك تهتمى بنظافه البشرة وتستخدمى غسول لبشرتك وكمان ممكن تستخدمى ميه الورد لأنها كويسه جداً ومناسبه للبشرة الدهنيه وممكن تستخدمى الماسك ده اثناء فصل الصيف ومكوناته:ردة+ ماء ورد.
والطريقة: ضيفي ماء الورد إلى الردة لغاية لما تلاقيها أصبحت على شكل عجينة لينة وحطيها على وشك ورقبتك لمدة ربع ساعة بعد مرور ربع ساعة افركي الخليط من على وشك بس خلّي بالك إن عملية الفرك دي تكون بلطف

-أفضل حاجه للبشرة الدهنيه إنك تنضفيها كل يوم بميه الورد وبالنسبه للمسام الواسعه فالماسك ده كويس جداً ومناسب للبشرة الدهنيه ومكوناته: 3 نقط عصير ليمون + معلقة كبيرة خميرة مدوبة في معلقتين ميه + معلقة نشا مدوبة مع معلقة ماء ورد + معلقتين لبن.
طريقة تحضير الماسك: بتحطي المكونات كلها مع بعضها لغاية ما يبقوا مزيج متماسك، ولو المزيج ناشف شوية ممكن تحطي شوية لبن، ولو المزيج طري بتحطي شوية دقيق بتحطي الماسك على بشرتك لمدة 5 دقائق، وبعد كده بتشيليه بالميه الفاترة، على فكرة الماسك ده بينظف البشرة وبيسد المسام الواسعة في منطقة الأنف أو الخدود وبيخفف الإفرازات الدهنية في الخدود ولو عايزة تستخدمى كريم لبشرتك فلازم يكون خالى من الزيوت (أويل فرى


-ماسك هايل لتفتيح البشرة الدهنية وهو عبارة عن لوز مطحون + بياض بيضة + نصف ليمونة.
الطريقة:
انقعي اللوز في الماء حتى تستطيعي نزع القشرة منه، واطحنيه في الخلاط حتى يصبح بودرة، وبعد كده اخلطي اللوز المطحون مع بياض البيضة مع نصف الليمونة لغاية ما تتجانس مع بعضها البعض، وبعد كده ضعي الخليط على وجهك لمدة 20 دقيقة وقومي بغسل وجهك بماء دافئ ثم ماء بارد بعد ذلك، وممكن تكرري الماسك ده مرتين في الأسبوع


19-الحمام المغربي

1- اقفلي أي منفذ للهواء في الحمام يعني تقفلي الباب والشباك وحتى الشفاط.
2- افتحي المية السخنة في البانيو على الآخر لغاية ما يبقى فيه بخار جامد في الحمام وبعدين سدي البانيو واملي نصه من المية السخنة.
3- جيبي طبق وامليه مية سخنة جداً وحطي فيه اللوفة الخشنة.
4- المطلوب في هذه المرحلة إنك تعرضي جسمك لأكبر قدر ممكن من البخار وده مش هيحتاج وقت أكتر من 5 دقائق بس.
5- بعد ما جسمك ياخد الكمية المحترمة من البخار تبدئي تحطي الصابون المغربي على جسمك ووجهك بس طبعاً تبعديه عن عينيكِ خالص.
المهم ازاي تحطي الصابون؟ تجيبي الصابون وتبدئي تفركيه على جسمك تفركيه بس من غير دعك، يعني بالراحة
6- سيبي الصابون على جسمك حوالي 10 دقائق.
7- اشطفي جسمك بالمية السخنة وبعدين حطي كمية تانية من الصابون بنفس الطريقة السابقة وسيبيه برضه لمدة 10 دقائق.
8- ممكن تستفيدي بالفترة دي في إنك تنضفي الكعبين بالحجر.
9. بعد ما تعدي الـ10 دقائق اشطفي جسمك من الصابون برضه بمية سخنة.
10- امسكي اللوفة الخشنة وابدئي في دعك جسمك (من غير الوجه) بشكل دائري وهتلاقي إن الخلايا الميتة في الجسم بتتشال بمنتهى السهولة.
11- بالنسبة لتنظيف الوجه بتستخدمي الإسفنجة الناعمة وده عن طريق مسح البشرة بحركة دائرية من غير الدعك أو الضغط عليها لأن الضغط على البشرة بيؤدي لظهور التجاعيد بدري.
12- دلوقتي بقى اشطفي جسمك كويس بالمية، واغسلي شعرك طبعاً، بس أهم حاجة ممنوع منعاً باتاً استخدام أي نوع من العطور أو مستحضرات التجميل اللي فيها عناصر كيمياوية، ولكن يفضل إنك تستخدمي الزيوت والمستحضرات الطبيعية وأحسن حاجة واللي أنصحك بيها هي زيت اللوز وده لأنه بيفتح البشرة ويلمعها، وممكن كمان إنك تضيفي ماء الورد للمية اللي بتشطفي جسمك بيها


20-حبوب بعد السويت في المنطقة الحساسة


وبالنسبه لأثار الحبوب فى المناطف الحساسه فالسويت أفضل طريقه لإزالته وممكن إنك تعملى الوصفه دى علشان تقلل لك من ظهور الحبوب، إخلطي 'قليلا من الماء' مع بودرة التلك وأعملي منها عجينة لينة توضع على المكان المنزوع منه الشعر وسيبيها حتى تجف واغسليها كويس


21-تفتيح المناطق الغامقة بالجسم

-ومكوناته: زبادي + ترمس مطحون + عصير برتقال
الطريقة إخلطي المكونات دي كلها مع بعضها،وافرديها على المناطق الغامقة في جسمك، وسيبيها لمدة 10 دقائق وبعد كده اشطفي جسمك بماء فاتر

- كمان إزالة الشعر بالسويت بصفة دورية كل 20 يوم من الكوع والركبة حتى لو مفيش شعر فيهم بيساعد على تفتيحهم

-وممكن تحطي زيت زيتون وبعد كده تدعكى المنطقه الغامقه بالملح والليمون، وبعد كده تغسلي جسمك.


21-أفضل كريم للشمسsun block

أفضل أنواع الصن بلوك بايوديرما، لونا، نيفيا
وأفضلهم بايوديرما

22-أفضل غسول وجه

بالنسبة للغسول نيتروجينا ودوف وديور


23-أفضل كريمات الليل والنهار

أفضل ماركات كريم الليل والنهار أولاى، نيفيا، ومنتجات أوريفليم


ثانيا:الشعر


1-تقصف الشعر

لازم تهتمى بشعرك وتعملى حمام زيت أو كريم مرة كل أسبوع على الأقل ودى أفضل ماركات حمام الكريم اللى ممكن تستخدميها وهي لوريال وبوناويل
وكمان لازم تقصى أطراف شعرك عشان التقصيف
ودى وصفه طبيعه بتعالج مشكله التقصيف ومكوناتها: موزة + معلقتين زيت زيتون + معلقتين عسل نحل وبتخلطي المكونات دي مع بعضها في الخلاط وبعد كده تحطيها على شعرك وتسيبيها لمدة ساعة وبعد كده تغسلي شعرك والوصفة دي ممكن تعمليها مرة كل أسبوع عشان تحسي بنتيجة،
وماتستخدميش السيشوار كتير لأنه بيقصف الشعر
وممكن تستخدمى بلسم بعد الشامبو ودى أحسن الأنواع (بانتين ، دوف ، هيربل)
وبالنسبه للسيروم فهو مش يبنعم الشعر ولا حاجه هو بيقلل من هيشان الشعر ودى أفضل الأنواع (زيرو فريز وكريستال)


2- الشعر الهايش والضعيف

ممكن تستخدمي الوصفة دي:
عن طريق إنك تجيبي المادة اللزجة اللي جوه نبات الصبار وتخلطيها مع كوب من زيت جوز الهند
وتحطي الخليط على النار لمدة خمس دقائق وبعدين حطيه في زجاجة
وسيبيه يبرد شويه وبعدين اعملي بيه حمام زيت لشعرك وبعد كده اغسلي شعرك بالشامبو،
وممكن تعملي حمام الزيت ده كل أسبوع والطريقة دي بتعالج كمان تقصف وجفاف وضعف الشعر.

3-الشعر الجاف

الزبادي،العسل، زيت الزيتون وهتخلطيهم مع بعض وتحطيهم علي الشعر كحمام زيت

4-تجاعيد الشعر

لازم تواظبى على إستخدام حمامات الكريم الطبيعيه ودي وصفة هايلة جدا هتساعدك على التخلص من تجاعيد الشعر نهائي
ومكوناتها: صفار بيضة واحدة + نصف ملعقة زيت زيتون+ كوب إلا ربع من الماء الفاتر.
الطريقة: اضربي صفار البيضة، يعني شيلي البياض منها لغاية ما يبقى سميك ولونه يفتح، وبعدين ضيفي نص معلقة زيت الزيتون تدريجيا مع التقليب المستمر، وبعد كده ضيفي المية تدريجيا، واستمري في الخفق وبعدين حطي الخليط ده في زجاجة، وبعد غسل شعرك بالشامبو المناسب لنوع شعرك دلكي شعرك بالملطف ده وسيبيه على شعرك شوية دقايق قبل ما تشطفي شعرك


5-لتطويل الشعر

-هايلة جدا لتطويل الشعر وكمان مكوناتها سهلة جدا كل اللي إنتي هتحتاجيه
علبة زبادي ومعلقة حبة البركة مطحونة (ودي هتلاقيها عند العطار) ومعلقة زيت زيتون.

الطريقة:أخلطي المكونات دي كلها مع بعضها
وبعد كده حطيهم على شعرك لمدة ثلاث أو أربع ساعات وطبعا غطي شعرك ببونيه وبعد مرور3 ساعات أغسلي شعرك بالشامبو والبلسم المناسبين
وكرري الموضوع ده مرتين في الاسبوع لمدة 3شهور


- ونبات الآس بيقال إنه فعلاً بيطول الشعر وممكن تجيبي زيت الآس من عند العطار وتعملي به حمام زيت لشعرك مرتين كل أسبوع.


6-تساقط الشعر

-وصفة طبيعية مفيدة جداً لعلاج مشكلة تساقط الشعر وهي عبارة عن زيت الخروع + زيت اللوز المر + زيت الزيتون
الطريقة:
امزجي مقدارا متساويا من زيت الخروع واللوز المر والزيتون مع بعض داخل زجاجة، وبعد كده خدي شوية صغيرة من مجموعة الزيوت دي ودلكي بيها فروة رأسك لمدة عشر دقائق قبل النوم، وبعد كده سرحي شعرك بمشط ذي أسنان متسعة، وبعد كده غطي شعرك بإيشارب مصنوع من القطن لغاية الصبح، وبعد كده لكِ الحرية إن إنت تغسلي شعرك بنوع شامبو مناسب إو إنك تسيبيه من غير غسيل.
والوصفة دي ميزتها إنها بتقوي الشعر من جذوره وتمنع تساقطه وكمان بتمنع ظهور القشرة، ولو فيه قشرة بتشيلها، وبتكرري الوصفة دي لمدة شهر، وبعد كده في الشهر التاني استمري في استخدام نفس الوصفة بس بدل كل يوم خليها يوم ويوم، وبعد كده كرري العملية دي مرة كل شهر

-تهتمى بنوعيه أكلك لان ده لى تأثير كبير على صحه شعرك
ولازم تعملى حمامات كريم أو زيت مرتين فى الأسبوع على الأقل وكمان قصى أطراف شعرك كل فترة
ودي وصفة هايلة كل جدا لانبات الشعر ومكوناتها سهلة كل اللي عليكي إنك تجيبي حزمة جرجير وضعيها في الخلاط مع كوب ماء, ثم ضعي عصير الجرجير على راسك واحرصي على أن يلامس فروه راسك لان تاثيره يكون في إنبات الشعر وتقويه البصيلات الضعيفه كرري هذه العملية كل يوم من غير ما تغسلي شعرك وبتغسليه مرة أو مرتين في الأسبوع وبتكرري الموضوع ده لمدة 3 شهور وهتلاقي نتيجة هايلة إن شاء الله


7-القشرة

بخصوص القشرة ففيه طريقة طبيعية ممكن تعمليه وهي إنك تشطفي شعرك بعد ما تغسليه بكمية من خل التفاح، وبلاش تستعملي أي شامبو للقشرة إلا بعد استشارة دكتور جلدية متخصص


8-لتنعيم الشعر

لازم تهتمى بشعرك وتعملى حمام كريم أو زيت مرة فى الأسبوع ودى أفضل ماركات حمام الكريم (لوريال ،بوناويل) وكمان دى وصفه طبيعيه بتساعد على تنعيم الشعر إخلطي مقادير متساوية من (الزبادي،العسل، زيت الزيتون) وضعيه علي الشعر كحمام زيت


9-أضرار فرد الشعر

كريمات الفرد مضرة جداً على الشعر وإنتى لازم تهتمى بشعرك وتقصيه وتستخدمى حمام كريم مرة فى الأسبوع ودى أفضل الأنواع اللى ممكن تستخدميها لوريال ،بوناويل وإبعدى عن إستخدام السيشوار، وطبعاً قص الشعر مفيد جداً.
وفرد الشعر بالاعشاب مش مضمون لانه فيه مواد كيمائية

10-حمام الكريم

علشان تعملي حمام الكريم بتغسلي شعرك كويس أوي بالشامبو المناسب لنوع شعرك وبعد كده توزعي الكريم على شعرك بطريقة متساوية وبكميات كبيرة وتدلكي فروة رأسك بأيديكي وبعد كده تغطي شعرك ببونيه للشعر ويكون أحسن كمان لو حطيتي فوطة مبللة بماء ساخن على البونيه عشان الحرارة بتفتح مسام فروة الرأس وتخليها تمتص أكبر كمية من حمام الكريم وتسيبي حمام الكريم على شعرك من 20 لـ 30 دقيقة وبعد كده تشطفي شعرك كويس ، وتنشفيه كويس بفوطة ناشفة وإنتي لسه في الحمام لإنك لو عرضتي شعرك لهواء بارد بعد حمام الكريم ممكن يضره، ودى أفضل أنواع حمامات الكريم (لوريال ، بوناويل ودوف وريفلون )


11-حمام الزيت

بالنسبه لحمام الزيت فبيتعمل على الشعر وهو ناشف، وبعد كده تسخني الزيت شوية على النار، وتبدأي توزعي الزيت على شعرك، وبعد كده تلفيه بفوطة مبلولة وتسيبي الزيت على شعرك لمدة ساعتين أو ثلاثة وبعدين تغسليه بالشامبو وتنشفيه كويس اوي.
وبالنسبة لنتيجة الماسك فهي بتبان بعد حوالي شهر من الاستخدام

الزيوت الطبيعية زي زيت اللوز وزيت الزيتون وزيت حبة الركة هما الأفضل لعمل حمامات الزيت للشعر.


12-أفضل طريقة للف الشعر قبل النوم

تقدري تلفيه كحكة أو ضفيرة أو تلفيه "طاقية" بس من غير ما تغطيه


13-أفضل كريمات التصفيف والزيوت

بالنسبة لكريمات التصفيف:باراشوت وبانتيت بديل الزيت وفاتيكا
بالنسبة للزيوت:فاتيكا ودابر لأملا

بس بلاش تدهني شعرك بكمية كبيرة


14-أفضل الشامبوهات

الشعر فأفضل أنواع الشامبو هي بانتين وهيربل اسينسز


ثالثا: أفضل ماركات الميك اب



*أفضل الماركات اللى ممكن تستخدميها وإنتى مطمنه فلوريل ومادينا وكيرولان وريمال وبورجوا وكريستيان ديور
(الماركات دي هتلاقيها في الصيدليات الكبيرة زي سيف والعزبي)

1-الكحل

أفضل ماركات الكحل اللى ممكن تستخدميها فلوريل، بورجوا، مدينا، وكيرولان


2-البودرة

وبالنسبة لأنواع البودرة الكويسة فدي أحسن الماركات "فلوريل" و"مادينا" و"كيرولان" و"ريمال" و"بورجوا" و"كريستيان ديور


3-الماسكارا

دى أفضل الماركات اللى ممكن تستخدميها بورجوا،ريمال، مدينا وكمان منتجات أوريفليم كويسه جداً


4-المانيكير

فمن الأفضل إنك تشترى نوع كويس زى أماندا أو لونا وكمان منتجات أوريفلام كويسة جداً



***** ****** ******* ******* ***** ***** ******






الرجوع الى أعلى الصفحة اذهب الى الأسفل
البسمة
المشرفه العامه
المشرفه العامه
avatar

عدد الرسائل : 9381
مزاجى :
تاريخ التسجيل : 17/12/2009

مُساهمةموضوع: رد: موضوع للبنات فقط ولوسمحتم بعد اذنكم مفيش ولاد تدخل   الخميس 05 أغسطس 2010, 17:13

موضوع حلو اوى اوى يا نورا

هو موسوعه للاهتمام بكل الجسم

مشكوره اختى عالمعلومات الرائعه

واللى استفدت منها كتير

ميرسى يا قمرايه

_________________





مفيش فى علبة الألوان
ولا لون واضح..
لا الأسود دايما حزين
ولا الأبيض
بقى يعرف يسامح..
بتتقابل الألوان مع بعضها
لكنها بتفترق
أول ما بتنهى المصالح..
لا ده لون الأمان
ولا ده لمسة حنان
ولا ده الدفا
اللى قادر يزيح البرودة.
يااااه..
مفيش لون فضل
زى ما عرفناه.
من يوم ما البحر اختفى
واللون الأزرق تاه..
لا الأصفر هو الخريف
ولا الأخضر
يعنى الحياة..


الرجوع الى أعلى الصفحة اذهب الى الأسفل
نورا
عضو ماسي
عضو ماسي
avatar

عدد الرسائل : 1386
مزاجى :
تاريخ التسجيل : 25/07/2010

مُساهمةموضوع: رد: موضوع للبنات فقط ولوسمحتم بعد اذنكم مفيش ولاد تدخل   الخميس 05 أغسطس 2010, 21:45

فعلا حبيبتى هى معلومات مهمه جدا وكويس انك استفدتى منها مشكوره حبيبتى على مشاركتك للموضوع بس الغريب حبيبتى ان فى ولاد بتقرا للبنات فقط وبردو بيدخلوا وعلى فكره دى تبقى ولا بلاش هما اصلا كلهم بيحبو يدخلوا للى ملهمش فيه
الرجوع الى أعلى الصفحة اذهب الى الأسفل
love
مشرف
مشرف
avatar

عدد الرسائل : 1915
مزاجى :
تاريخ التسجيل : 21/12/2009

مُساهمةموضوع: رد: موضوع للبنات فقط ولوسمحتم بعد اذنكم مفيش ولاد تدخل   الثلاثاء 10 أغسطس 2010, 20:56

صديقتى نورا
بجد موضوع فى منتهى الجمال
انا استفدت منها كتير اوى
شكرآ حبيبتى
على هذا الموضوع الرائع

_________________

 


 



 



 


 


عندما ياتى المساء وتاوى العصافير الى حضن اعشائها
عندما تقبل النجمات وجة السماء
عندما يشرق القمرتعانقة حاشية وردية اللمعات
عندما تهل صورتك الحبيبة تعطر اجواء الفضاء فى عينيك الحبيبتين
لتصبح فى لحظة امير العاشقين


 


 


 


 


 

الرجوع الى أعلى الصفحة اذهب الى الأسفل
نورا
عضو ماسي
عضو ماسي
avatar

عدد الرسائل : 1386
مزاجى :
تاريخ التسجيل : 25/07/2010

مُساهمةموضوع: رد: موضوع للبنات فقط ولوسمحتم بعد اذنكم مفيش ولاد تدخل   الثلاثاء 10 أغسطس 2010, 21:08

اهم حاجه حبيبتى انك استفدتى منه ومشكوره على ردك للموضوع
الرجوع الى أعلى الصفحة اذهب الى الأسفل
 
موضوع للبنات فقط ولوسمحتم بعد اذنكم مفيش ولاد تدخل
الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
منتدى الحب :: الاسرة والمجتمع :: ملكات الحب-
انتقل الى: